CEBU, Philippines - Andam na ang tanan alang sa Lapu-Lapu Basketball Association (LLBA) season 4 nga uloha'g "LLBA Rollway Cup" karong Mayo 16 diha sa Agus gym sa Lapu-Lapu City.
Ning tuiga, adunay 12 ka teams ang magkumbati alang sa korona ug dungog ning tinuig nga liga nga gisuportahan sa Rollway Custom Brokerage ni Rolly dela Pieza.
Gawas sa naandang motorkada sa mga partisipanteng koponan, ang paghagpat og best muse usa sa molamas sa opening ceremony. Ang motorkada sugdan sa ala-1 sa hapon ug adto kini manukad sa Villas Magallanes sa Sta. Lucia Property, mosubay sa kadalanan sa Pusok, Mactan lahos na sa Agus gym diin adto himuon ang hamubong programa.
Sa dili pa ang opening game, adunay 1-on-1 exhibition game tali nilang Fader Decembrano ug Kirby Gutib.
Mga partisipanteng koponan naglakip sa Ave Maria Sanctuary Park, AJY Bong, Verlex, RoRo Transport, Yan C Rico, Ace Penzionne, Sol Meat, John Videoke, VKK Divers, RN-Puyat Steel, Tango ug ang All Box Packaging.
Moduwa kini og single round-robin format sa elimination round diin ang top 2 teams makabaton og "twice-to-beat" advantage sa semifinals. Ang modaog mao mag-abot sa tinaktakay nga kampiyonato.
Lain pang nagpaluyo sa LLBA Rollway Cup 2010 mao si Atty. Rico Amores, coach Jun Tan ug Lapu-Lapu City Commission Harry Radaza. – BANAT NEWS