Takayama, Bon Jovi moladlad sa ilang abilidad sa Mandaue

CEBU, Philippines - Ang Cebu-based Japanese boxer Katsunari Takayama ug Larry 'Bon Jovi' Canillas ang moladlad sa ilang abilidad karong Mayo 22 diha sa Mandaue City Cultural and Sports Complex.

Si Takayama, ang kanhi WBA/WBC minimumweight champion ug ang ALA prospect nga si Canillas makigsangka batok sa tagsa-tagsa nila ka kaatbang sa fight card nga gipasiugdahan sa ALA Promotions.

Ang kanhi world champion nga si Takayama naila isip “Filipino Destroyer” tungod sa   iyang pagpukan sa mga Pinoy boxers nga naglakip nilang Rollen del Castillo sa ALA Gym, Elmer Gejon, Mating Kilakil ug Fabio Marfa.

Midaog sab siya pinaagi sa puntos batok ni Panamanian Carlos Panama, kinsa nabiktima ni Milan Melindo dihang nanulong kini dinhi sa Sugbu.

Unang nakuptan ni Takayama ang WBC title human niya gipilde ang Mehikanong si Isaac Bustos niadtong Abril 4, 2005 didto sa Osaka Japan, apan nawala dayon kini sa iyang mga kamot dihang napilde siya   ni Eagle Den Junlophan.

Si Takayama nag-ensayo karon sa nabantog nga ALA Gym agi'g pagpangandam alang sa ikatulo niyang world title fight batok ni IBF king Nkosinathi Joyi sa South Africa.

Sa supporting main event, ang knockout artist nga si Canillas sa Toledo City, mosuway pagkulit sa ikaunom niyang knockout win batok ni Dexter Mendoza.

Lab-as pa gikan sa iyang impresibong kadaugan batok ni African Fred Sayuni didto sa Dubai niadtong Abril 23, si Canillas mao karon ang usa sa mga boksidor nga adunay taas nga knockout percentage sa tanang Pinoy boxers.

Lakip sa mga nakatilaw   sa kabangis ni Canillas ibabaw sa ring mao sila si Roger Galicia, Donriel Marcos, Petch Twins Gym sa Thailand ug si Sayuni.

Si ALA Promotions president Michael Aldeguer nagkanayon nga duha o tulo ka away na lang ang gitagana niya ni Canillas sa dili pa niya kini iparang batok sa usa ka Mexican boxer aron sukdon ang iyang kalig-on. – BANAT NEWS