VISSA tankers naka-gold sa 12th HK swim meet

CEBU, Philippines - Usa ka gold ug duha ka bronzes ang nahakot sa Visayas Integrated Swimming Association (VISSA) sa pagtapos sa 12th Hong Kong International Invitational Swim Meet niadtong miaging adlaw didto sa Hong Kong International School sa Tai Tam, Hong Kong.

Sila si Don Julio Juan ug Antonne Carlo Villahermosa sa Maria Montessori International School uban nila ni Jack Donald Gibb ug Jason Ginn Lopena sa University of Bohol maoy mitunol sa bugtong bulawan alang sa VISSA kortesiya sa 4x50m medley relay.

Gawas sa gold, nakabingwit sab og bronze medal si Don Julio Juan sa 100m breaststroke, samtang ang ikaduhang bronze gihatag ni Ferle Estrera sa 50-m butterfly event.

Mikompleto sa komposisyon sa VISSA ni head coach Bas Ceballos ug asst. coach Vince Indig mao sila si Myles Ioannis Chi, Dyza Bianca Saco ug Veana Mei Lim sa University of Bohol .

Gawas sa VISSA, misalmot sab sa torneyo   ang laing 400 ka swimmers gikan sa Manila, Hong Kong, Beijing ug Shanghai.   (BANATNEWS)