Losiaboi, Tabal nag-una sa Sundown Run

CEBU, Philippines - Managlahing kapalaran ang nahiaguman sa duha sa mga premier runners dinhi sa Sugbu nga sila si Kenyan Simon Losiaboi ug Mary Grace Delos Santos sa SRP Sundown Run didto sa South Road Properties.

Sa makausa pa, nag-una na usab sa 10k men’s open si Losiaboi, apan napilde ang taga-Zamboanga nga si Delos Santos batok sa garbo sa Southwestern University (SWU) nga si Mary Joy Tabal.

Si Losiaboi mitapos sa lumba sa oras nga 36:04.41, gisundan ni Jobert Carolino sa ikaduhang dapit sa oras nga 37:55.91 ug Riez Enriquez nga mikulit og oras nga 37:50.99 sa oras nga 37:50.99. 

Nag-una si Tabal sa oras nga 44:41.33 batok ni Delos Santos nga mirehistro og oras nga 45:15.05, samtang ang third placer nga si Madelyn Carter mikutlo og oras nga 45:48.12.

Sa iyang bahin, wala nagmahay si Mendel Lopez sa pag-apil sa mas mubo nga 5k category human siya midaog sa men’s open sulod sa 16 minutos ug 40 segundos, gisundan ni Phillip Dueñas nga miabot sa finish line sa oras 16:48 ug Joel Delposo sa oras nga 17:27.

Nanghawud sa women’s division si Meriam Miranda sa oras nga 21:44, samtang sila si Aiza Suwaybaguio (22:28) ug Clarrise Diongson (23:06) maoy migawas nga runner-ups.

Sila si Jorry Ycong ug Crizel Diongson mao usab ang mananaug sa 3k fun run. Si Ycong mirehistro og oras nga 9:56.12, samtang si Diongson mitapos sa lumba sud sa 12 minutos ug 38 segundos. – BANAT NEWS