Adlawan misidlak didto sa SRP

CEBU, Phillipines - Midominar na usab ang garbo sa Sugbu nga si Jon-Jon Adlawan kinsa misakmit og duha ka titulo sa gipahigayung SRP Invitational Motocross tournament niadtong miaging adlaw didto sa South Road Properties.

Bisan paman sa presensiya sa uban pang mga tang-ang riders sa nasud, misidlak gihapon si Adlawan kinsa maoy kampiyon sa expert ug premier pro category.

Unang nag-abot ang dalan ni Adlawan ug karibal niini nga si Kenneth San Andres sa pro class, diin gipakita sa international motocross rider ang iyang katakus aron masakmit ang titulo.

Si San Andres mipahiluna sa ikaduhang dapit, samtang si Jubenile Abellar mitugpa sa ikatulong dapit.

Yano ra usab kaayong giharus ni Adlawan ang expert division, gisundan ni Irwin Uypitching ug Abellar isip second ug third placer.

Namawi si Abellar sa intermediate class human niya gilabni ang titulo uban sa iyang igsuon nga si Juvanni ug Miggy Tolentino isip runner-ups. Si Tolentino maoy hari sa novice open production, samtang si Cyril Tariman ug Adam Uypitching maoy second ug third placer.

Nakakuha usab og double-victory si Seigfred Ornopia human siya midominar sa veterans A ug B, samtang si Donkey Sanchez mao ang nag-una sa open enduro ug si Joseph del Socorro mao ang kampiyon beginners production.

Wala usab magpauwahi si Peewee Galla kinsa mao ang misakmit sa korona sa peewee class. – BANAT NEWS