Pure Serv naka-ipsot sa OT

CEBU, Philippines - Usa ka krusyal nga three-pointer ang gibuhian ni Gaga Cabanilla sa overtime nga maong nahimong game sa kadaogan sa Pure Serv Mineral Water batok sa ESG Motors sa iskor, 76-72 atol sa pagbukas sa Guadalupe Athletic Association (GAA) Founder’s Cup kagahapon didto sa Guadalupe Sports Complex.

Kanunay gyud naglabay ang Pure Serv sa fourth quarter apan ila kining giusikan ilabi na una silang nasulod sa penalty didto sa may 5:20 pa ang nahibiling oras ug ang ESG aduna la’y duha ka team fouls.

Hinay-hinay mikamang ang ESG sa unahan gikan sa ilang 50-58 biya sa fourth period aron molabaw og balik, 67-65 may 1:29 ang nahibiling oras.

Wala madugay, natabla pag-usab ang iskor human sa usa ka free throw nilang Roy Sollano ug Calixto Perez, 67-all may 6.7 ang oras aron pagpugos og overtime.

Didto na sa overtime nakalingkawas ang Pure Serv human sa three-pointer ni Cabanilla ug sa mga tirada nilang Perez ug William Jabines.

Sila si Paul Dayoja ug Jabines parehong miposa og 11 puntos aron pangulohan ang Pure Serv samtang sila si Cabanilla ug Perez parehong midugang og 10 puntos.

Tulo ka batos ni ESG playing coach Boy Te pulos miburak og double figures apan ang wala pagduwa sa ilang pambatong three-point specialist nga si Inting Reyes maoy gitumbok nga hinungdan sa ilang kapildehan.

Puntos matag usa:

Pure Serv (76)— Jabines 11, Dayoja 11, Cabanilla 10, Perez 10, A. Sollano 7, Sanoy 7, Lesmes 5, Ancot 2, Abellana 2, R. Sollano 1

ECG Motors (72)— Borinaga 19, Rahasajo 15, Gabunada 14, Rances 7, Te 4, Bacatan 4, Vertudazo 3, Dela Rosa 3, Mendoza 2 Halftime: 35-26. – BANAT NEWS