CEBU, Philippines - Ang Yaw-Yan ArDigma Martial Arts Federation Inc. padayong manawat og mga estudyante alang sa second batch sa ilang summer clinic sugod karong Mayo 10 diha sa 4th floor sa Coast Pacific Downtown Center sa dalan Sanciangko atbang sa UC-main campus.
Ang Yaw-Yan Ardigma nga nailhan usab sa ngalan nga “Sayaw ng Kamatayan” usa sa mga orihinal nga Pinoy Martial Arts nga unang gilusad niadtong 1972 ni Grand Master Napoleon 'Nap' Fernandez.
Ang maong matang sa martial arts nagtudlo sa mga estudyante og saktong self-defense gamit ang nagkadaiyang parte sa ilang lawas isip hinagiban. Gawas pa niini, tumong usab sa maong summer clinic mao ang paghatag og lingaw sa mga kabatan-onan ilabi na karong panahon sa bakasyon.
Lakip sa mga kurso nga itudlo sa maong summer clinic mao ang arnis, boxing, fitness, Yaw-Yan combat, Yaw-Yan ardigma system ug Mixed Martial Arts (MMA)
Alang sa dugang mga detalye, mahimong motawag sa 09198215582 ug 09327316232. – BANAT NEWS