Domingo angay magmatngon

CEBU, Philippines - Dili katiaw-tiawan ang kakusog ug kabangis sa kumo ni Luis Melendez, kinsa manulong dinhi sa Sugbu aron sangkaon si kanhi WBO Oriental bantamweight champion Michael Domingo karong Mayo 23 diha sa Waterfront Cebu City Hotel and Casino.

Kini mao ang gihulagway ni Z Gorres, kinsa mipasidaan sa iyang suod nga higalang si Domingo nga dili mokompiyansa batok ni Melendez.

Matud ni Gorres nga kinahanglan hugtan kanunay ni Domingo ang iyang depensa nga maoy daku niyang sayop nga miresulta sa iyang pagkatumba human mataghapi sa makusog nga kumo ni Melendez.

Si Melendez, kinsa adunay rekord nga 26 ka daog, diin 21 gikan sa knockout, init karon sa mga mata sa mga Sugbuanon tungod kay mao kini ang nakaputol sa boxing career ni Gorres.

Kahinumduman, nga atol sa ilang sangka niadtong Nobiyembre 14 didto sa House of Blues sa Mandalay Bay Hotel and Casino sa Las Vegas, wala damha nga mibuhi'g usa ka makusog nga right hook si Melendez nga maayong pagkaigo sa ulo ni Gorres.

Nakabarog pa si Gorres sa katapusang hugna sa away, apan nawad-an kini'g panimuot pipila ka gutlo human sa iyang "unanimous decision" nga kadaugan.

Apan ang trainer ni Melendez nga si Martin Valdez nangangkon karon nga biktima sa pagpanikas ang iyang boksidor tungod kay giputol sa mga opisyales ang oras human sa pagkatumba ni Gorres nga maoy mihaw-as sa Pinoy gikan sa kapildihan.

Moaway usab sa undercard si KO artist Jimrex Jaca, kinsa mipalandong na karon sa ALA Promotions batok ni James Kimori sa Kenya.

Alang sa ticket reservations, mahimong motawag sa   236-4611. – BANAT NEWS