Surigao tankers hari sa 11th VISSA swimfest

CEBU, Philippines - Wala magmahay   ang Surigao City Division Swim Team sa ilang pagpanulong dinhi sa Sugbu kay sila ang migawas   nga overall champion sa 11th VISSA Inter-School Swimming Competition didto sa Pres. Diosdado Macapagal swimming pool sa Dumanjug.

Ang Surigao Swim Team miharos sa tulo ka dibisyon, 12-under, 13-17 ug sa 18-above categories.

Ang Surigao Swim Team mihakot og 12 ka bulawang medalya sa 12-under division sa pagpangulo nila ni Cassidy Pospia sa managsuong Emma Rose ug Elijah Tyler Bertel.

 Mikabkab sab og bulawan ang Surigao sa 18-above division kortesiya nilang Hazel Ecleo ug Ronel Tandayag nga maoy naghari sa tagsa-tagsa nila ka kategoriya.

Ang University of Bohol ug Talisay City Swim Team maoy mipahiluna sa ikaduha ug ikatulo nga mga dapit sa 12-under division. Ang University of San Jose-Recoletos mao ang runner up sa 13-17 category.

Mikompleto sa top three sa 18-above division mao ang University of San Carlos ug Dumanjug District Swim Team. – BANAT NEWS