MANILA, Philippines - Isang must-win game ang kakaharapin ngayon ng University of San Jose-Recoletos sa pagtatapos ng elimination round sa Shakey’s V-League Season 7 sa The Arena sa San Juan.
Kalaban ng Lady Jaguars ang Lyceum sa una sa tatlong laro na itinakda ganap na alas-2 ng hapon at kailangang manalo ang Visayan team upang manatiling nasa kontensyon sa hangaring makalaro sa quarterfinals sa ligang inorganisa ng Sports Vision at handog ng PLDT MyDSL sa tulong ng Shakey’s Pizza.
Wala pang panalo sa tatlong laro ang Lady Jaguars habang ang Lady Pirates naman ay mayroong 2-1 karta para makasalo sa ikalawang puwesto sa Group B kasama ang Adamson.
Ngunit kung makasilat ang USJ-R, makakatabla nila ang pumapang-apat na St. Benilde (1-3) upang makahirit ng one-game playoff para sa huling puwesto sa quarterfinals.
Kailangang magpakita ng tibay ng laro ang tropa ng dating national player na si Grace Antigue dahil hangad ng Lady Pirates na makabawi rin sa huling pagkatalo sa Ateneo nitong Martes.
Si Thai import Pornthip Santrong ang inaasahang mangunguna sa koponan matapos malimitahan lamang sa 10 puntos ng depensa ng Lady Eagles.
Pinal na placings naman ang paglalabanan ng mga koponang maglalaro sa susunod na dalawang laban kasama ang tagisan ng Ateneo at Adamson dakong alas-6 na kung saan ikaapat na sunod na panalo ang hanap ng Lady Eagles para mapangunahan ang Group.