Swimming palalawigin pa ni Joseph kaysa...

MANILA, Philippines - Sa halip na makipag-away ay nais na lamang ni Mark Joseph na ituon ang isipan sa pagpapalawig ng larong swimming sa ban­sa.

Nakuha uli ni Joseph ang karapatan na pangu­nahan ang swimming sa bansa nang iupo uli bi­lang pangulo ng Philippine Aquatics Sports Association na dating kilala bilang Philippine Amateur Swimming Association.

Ang eleksyon ay idinaos nitong Sabado ng ga­bi sa Mactan Shangrila Hotel sa Cebu at kasamang iniupo ni Joseph ay sina Luisito Mangahis bi­lang vice president, Ral Rosario bilang sec-gen, Christina Inigo bilang exe­cutive director at Akiko Thomson-Guevarra bilang treasurer.

Si Thomson-Guevarra na commissioner din ng PSC ay maninilbihan lamang matapos bumaba sa kanyang puwesto sa komisyon.

Pinasalamatan ni Joseph ang mga naniwala sa kanyang kakayahan at ipinangakong magtatraba­ho para maitaas pa ang an­tas ng sport sa bansa.

Kung makakaya niyang gawin ito ng walang problema ay isang malaki pang katanungan lalo nga’t inaatake siya ng katunggaling grupo na Amateur Swimming As­sociation of the Philippines (ASAP) bukod pa ni Special Assistant to POC president Go Teng Kok.

Iisa ang kanilang tin­u­ran laban kay Joseph, na hindi tumalima sa batas ng NSA at ng POC ang isi­nagawang eleksyon.

Kinukuwestiyon din ng ASAP na pinamumunuan ni Atty. Ma. Luz Arzaga Men­doza ang pagpapalit ng pangalan ng PASA na isang aksyon upang ma­ka­iwas sa kasong paglulustay ng pera si Joseph.