MANILA, Philippines - Tinalo ni Dennis “Robocop” Orcollo si Warren “Warrior” Kiamco, 21-14, para makaabante sa 2010 World Pool Championships (WPA World 9-ball) na nakatakda sa Hunyo 27 hanggang Hulyo 5 sa Doha, Qatar.
Kinontrol ng International Predator 10-ball champion na si Orcollo ang laro upang manaig sa nasabing qualifying round ng Billiards and Snooker Congress of the Philippines (BSCP).
Ang dating mangingisda mula sa Bislig, Surigao del Sur na si Orcollo ay makakasama nina Ronato “Volcano” Alcano, Marlon “Marvelous” Manalo, Lee Vann “The Slayer” Corteza, Antonio “Nickoy” Lining at Antonio “Ga-Ga” Gabica sa tournament proper.
Maliban sa 2010 World Pool Championships sa Doha, Qatar, dalawa pang malalaking torneo ang lalahukan ni Orcollo.
Sasabak ang Filipino cue master sa 2010 Party Poker World Pool Masters at sa kauna-unahang United States Open 10-Ball Championships.
Idaraos ang 2010 Party Poker World Pool Masters sa Mayo 12 hanggang 16, samantalang sasargo naman ang US Open 10-Ball Championships sa Mayo 17 hanggang 22.
Ang dalawang torneo ay lalaruin sa Riviera Hotel and Casino sa Las Vegas, Nevada.