USPF sud semis sa 14th Nestea Fit Beach Volley

CEBU, Philippines - Misubay og managlahing dalan ang defending champions University of Southern Philippines Foundation (USPF) ug University of San Jose-Recoletos (USJ-R) sa ilang kampanya pagdepensa sa tagsa-tagsa nila ka korona sa 14th Nestea Fit Beach Volley "Battle of the Champions" didto sa Boracay Island.

Ang mga reyna sa beach volley sa nasud nga sila si Erika Camille Verano ug Apple Eve Saraum sa USPF nakakuha og lingkoranan sa semifinals human nila gitapos ang

 ilang katapusang duwa kagahapon.

Apan subo nga palandungon kay ang tandem nilang Ariel Carumba ug Loujei Tipgos sa USJ-R dili makadepensa sa korona sa men's division karong tuiga, apan laing pambato sa USPF nga sila si Edward Ybañez ug Emmanuel Marlon Luces gilantaw nga adunay paglaum nga makahatag og dungog sa Cebu.

Ang USPF ni coach Thelma Datig miagi pa'g tulo ka sets una nila mapilde ang CHED National Games champions Lourdilyn Catubag ug Karen Quilario sa University of Mindanao

(UM)-Tagum, 16-21, 21-14, 15-13.

Atol sa quarterfinals, ang Verano-Saraum tandem milupig sa NCAA-South champions Philippine Christian University (PCU)-Dasmariñas, 21-12, 21-11.

Ang USPF moharong sa UAAP champions ug mao sab ang ilang karibal sa kampiyonato sa miaging tuig Adamson University sa semifinals karong buntag, sundan kini sa duwa tali sa Central Philippines University (CPU) ug sa UM-Tagum.

Sa men's bracket, sila si Carumba ug Tipgos napakyas sa ilang kampanya alang sa ilang sunod-sunod nga titulo human masugamak ngadto sa UAAP champions Jason Ramos ug Henry Campaña sa University of Sto. Tomas (UST) sa quarterfinals.

Ang USJ-R ni Cebu Sports Hall of Famer coach Grace Antigua mipukan sa UST, 21-17, 21-18 atol sa eliminasyon. Ang   UST nakabawos sa quarterfinals, 21-18, 21-19. (BANATNEWS)