Managsuong Ornopia nanghawod sa tagsa-tagsa nila ka dibisyon

CEBU, Philippines - Mihimo na sab og double-victory si Earl Jean Brylle Ornopia sa 3rd leg sa Keiz BJ Motors Wanggits and Habal-Habal Showdown niadtong Abril 18, 2010 didto sa Caduawan, Tabogon sa amihanang bahin sa Sugbu.

Si Ornopia, 10-anyos nanghawod sa Mini 65cc ug sa Mini 85cc categories.

Sila si JP Cuesta ug Tamtam Largosa maoy mi-okupar sa ikaduha ug ikatulo nga mga dapit sa Mini 65cc division. Samtang sila si JM Mayol ug JP Cuesta mao sab ang mipahiluna sa mosunod nga duha ka mga dapit sa 85cc division.

Wala sab magpabitin ang duha ka igsuon ni Brylle nga sila si Ken Kerry ug Kerry Keizer nga    mao sab ang naghari sa tagsa-tagsa nila ka dibisyon.

 Si Ken Kerry maoy naghari sa Pewee below-7 division human niya gipilde ang iyang manghod nga si Keizer ug si Vinz Batulan, kinsa napunta sa ikaduha ug ikatulo.

Wala sab hinuon maguol si Keizer kay siya man nakaangkon sa titulo sa Pewee below-5 division.

Sama ni Brylle, kinsa miugkat sab og duha ka titulo sa 12th Ornopia Cup sa 2nd leg sa MS Motosuit Motocross Series, sila si Russel Gungob ug Dongdong Batiquin milangkat sab og duha ka korona.

 Si Gungob maoy naghari   sa executive-A ug beginners selection, samtang si Batiquin mao sab ang naghari sa beginners open production ug beginners open enduro.

Laing milangkat og titulo mao sila si Sarge Espina sa Wanggits Forever category, Jonathan Tapayan sa Wanggits, Titing Sicad sa executive-B ug Julius Cabrera sa pantra/underbone.

Gipasiugdahan ni Siegfred Ornopia sa Kiez BJ Motors, ang lumba gipaluyohan nila ni Celestino Martinez III ug Hon. Zigfred Pavadora Duterte nga maoy major sponsors uban nilang Dr. Philip Montejo, Alicia Mangubat ug sa Manang Lourdes Furniture.   (BANATNEWS)