Super Idols nag-una sa IBP cagefest

CEBU, Philippines - Nasakmit pagbalik sa defending champion Super Idols ang solong liderato human ilang gilubong ang Pañeros, 76-42 sa 4th Integrated Bar of the Philippines (IBP) 2010 basketball tournament didto sa Capitol Parish gym sa dalan Escario, ning dakbayan.

Sa maong kadaugan, ang Super Idols mibalik na'g lingkod sa kinatas-ang dapit bitbit ang 6-1 nga baraha, samtang ang Pañeros, Pencadela Law Firm ug ang Young Lawyers Association of Cebu (YLAC), nagsawo sa ikaduhang dapit sa managsamang 5-2 win-loss records.

Sa lain pang mga duwa, ang Pecandela mikulit sab og daog batok sa Bros N Law nga gipangulohan sa managsuong Rama nga sila si Estong ug Enric sa iskor nga 54-50. Gipanitan sa YLAC ang nalukapa nga Iron Eagles sa iskor nga 60-39 ug ang Mt. Zion midaog batok sa Yan C. Rico sa iskor nga 65-56.

Si Benjo Santiago maoy topscorer sa Super Idols sa iyang game-high 31 puntos, samtang si Fermin Pepito miamot og 19 puntos. Si Ting Ordeniza mao sab ang nangu sa Pañeros pinaagi sa iyang 12 puntos.

Sa laing bahin, sila si Francis Pepito ug Mark RussGamallo miduslit og krusyal nga 24-20 run sa fourth period aron luwason ang Pecandela, kinsa midaog og kuwatro puntos. Si Pepito mihakot og 15 puntos alang sa Pecandela, samtang sila si Gamallo ug Tommy Yu midugang og 12 ug 11 puntos, matag usa.

Si Francis Javelosa mao sab ang nangulo sa Bros N Law sa iyang 17 puntos.

PUNTOS MATAG USA

Unang duwa:

Super Idols (76) - B. Santiago 31, F. Pepito 19, Abayon 8, Quijano 4, Ibones 4, M. Santiago 4, Zosa 2, Heyrosa 2, B. Pepito 2

Pañeros (42) - Ordeniza 12, Cagulada 10, Busi 10, Manching 3, Balorio 3, Feliciats 2, Calipayan 2

Ikaduhang duwa:

Pecandela (54) - Pepito 15, M. Gamallo 12, Yu 11, Tenefrancia 7, Enad 5, I. Gamallo 2, Cañete 2

Bros N Law (50) - Javelsos 17, Dumon 11, Bauzon 10, Ceniza 5, E. Rama 5, Rama 2   (BANATNEWS)