7 ka CCSC boxers 'daog
CEBU, Philippines - Pito sa siyam ka mga boksidor gikan sa Cebu City Sports Center (CCSC) Stable ang midaog sa tagsa-tagsa nila ka away sa “Paboksing sa Cabadiangan” didto sa Cabadiangan open grounds, lungsod sa Compostela.
Sa main event, gipaundang ni Joel Recabo sa Omega Stable ang iyang karibal nga si Jumar Cabillon sa RWS Stable aron maghari sa 60 kgs. division.
Ang amateur prospects sa CCSC Stable mipakita na usab sa ilang katakus batok sa boksidor gikan sa nagkalain-laing stables dinhi sa Sugbu.
Si Rodex Piala maoy unang mihatag og daog sa CCSC human buntoga si Christian Pareja sa BJA stable. Gisundan ni Alil Ala, kinsa mikulata ni Moller Valencia sa RWS Stable ug Anthony Coral nga midaog pinaagi sa decision batok ni Rommel Laag.
Ang managsuong Refuella nga sila si Allan ug Ian mikulit sab og daog batok sa managlahing kaatbang sa 52 kgs.division, Si Allan midabodabo ni Jomarie Yuson sa Pit-os, samtang si Ian mipukan ni Jomar Alburo sa Bogo City Stable.
Midaog sab si Pio Fanuga sa Basak stable pinaagi sa split decision batok ni Nicoli Unabia, 2-1.
Lahi sa ilang kaubanan, duha ka boksidor sa CCSC nga sila si Jay-R Barroma ug James Castel ang wala buligi og maayong kapalaran human miyukbo ngadto nila ni Jordan Catubay sa Omega Stable ug Jesus Second sa RWS Stable. (BANATNEWS)
- Latest
- Trending
