CEBU, Philippines - Nakabangon si Welberth Loberanis human malukapa sa second round aron pagposte og unanimous decision nga kadaugan batok ni Rommel Banquirego sa flyweight division sa 2nd Mayor Jonas C. Cortes Amateur Boxing Cup didto sa Mandaue City Plaza Square.
Mikonekta'g usa ka makusog nga hook si Banquirego sa round 2 nga maoy nakatumba ni Loberanis. Si Loberanis daling nakabarog ug mao na ang mikulata'g maayo ni Banquirego.
Human sa upat ka round nga binukbukay, tulo ka mga hurado ang mi-iskor og 38-37, pabor ni Loberanis.
Sa laing mga duwa, si Eman Labanza sa Balamban mikulit sab og unanimous decision nga kadaugan batok ni Romano Gelig sa Bohol sa ilang six-rounder ubos sa bantamweight division. Si Labanza nag-una sa judges scorecard, 60-54, 59-55 ug 59-55. Midaog sab si Zaldy Aroa sa Bantayan Island batok ni Marjun Baliguat pinaagi sa split decision.
Gihunong ang away sa ikatulong round human si Aroa nakaangkon og dakung gisi sa walang bahin sa iyang kilay mugna sa accidental headbutt.
Ang pambato sa IPI Gym nga si Romero Urpanel napilde ngadto ni Kotsky Ebalang sa Cagayan de Oro sa ilang superflyweight match. (BANATNEWS)