CEBU, Philippines - Tungod sa kalamposan sa una nilang Alaska Power Camp summer basketball clinic sa miaging tuig nga gisalmotan og kapin sa usa ka gatos ka mga bata, ang coach sa University of Cebu (UC) Webmasters nga si Roel Gomez kinsa usa ka produkto sa Alaska Aces sa PBA, mipahibalo nga andam na silang modawat og partisipante alang sa ilang ikaduhang clinic karong Mayo 6 hangtod ngadto sa May 21 didto sa Don Bosco Technology Center (DBTC) gym sa barangay Punta Princesa, ning dakbayan.
Ang nahisgotang clinic pagahimoon matag 8-10 sa buntag gikan sa Lunes hangtod sa Sabado ug adunay P1,200 nga registration fee matag usa.
Si Gomez kinsa maoy head trainor sa maong clinic, nagkanayon nga ilang ipakatap ang Alaska Power Camps sa mga dagkong dakbayan sa nasud nga magkalip sa Bacolod ug Davao.
Karong tuiga, gidugangan ngadto sa walo ka mga coaches ug trainors aron maoy moabag ni Gomez sa pagpahigayon sa clinic aron mas palapdan pa ang ilang pagbansay-bansay sa mga bata nga mahiligon sa basketball ug maanindot ang mahimong resulta. Nagsugod na sila og panawat og mga partisipante ug pipila na lang ka buok ang dawaton sa dili pa nila tapuson ang pag-pangrehistro.
Kinsa kadtong gustong mosalmot sa maong clinic gi-awhag sa pagkontak kang Gomez alang sa reservation sa 346-6577 (landline) ug sa mobile phone numbers 09179823475 (Globe) ug 09327387039 (Sun).
Ang tanang mosalmot makadawat og libreng reversible upper jerseys, usa ka bola nga maoy gamiton sa training ug ingon man certificates of attendance nga ipanghatag atol sa pagtapos sa clinic sa Mayo 21. – BANAT NEWS