Luga, Verdida hari sa Tejero chess tilt

CEBU, Philippines - Gipilde nila ni Detlef Luga ug Bobeth Verdida ang ilang kaatbang aron paghari sa tagsa-tagsa nila ka dibisyon sa Christian Athletics Volunteers (CAV) Chess tournament didto sa TRSBBC Compound sa Brgy. Tejero,ning siyudad.

Si Luga mipukan ni Joshua Guinto sa finals aron sakmiton ang titulo sa 17-under category. Si Jowan Luga mipahiluna sa ikatulong dapit.

Samtang si Verdida mao sab ang milangkat sa kampiyonato sa seniors division human niya giharos ang final round batok nila ni Bonifacio Yncierto ug Pastor Tony Guinto, kinsa mi-okupar sa ikaduha ug ikatulo nga dapit.

Mikompleto sa top five winners mao sila si Jason Nadela ug Joselito Verdida.

Gawas sa mga tropeyo, ang top three winners mibulsa sab og ganting salapi. Ang mipahiluna sa ikaupat ug ikalima nga dapit gihatagan og consolation prizes.

Ang maong torneyo gipasiugdahan sa CAV ubos sa liderato ni Pastor Jonathan Santamaria. Giabagan sab kini sa Oriental Port and Allied Services Corporation (OPASCOR) pinangulohan sa ilang general manager Atty. Tomas Riveral ug sa Young Friends of Jesus (YFJ). – BANAT NEWS