CIIS makigsangka batok assessment karon

CEBU, Philippines - Laing duha ka luna sa semifinals ang paga-ilogan karong gabhiona diin magtakos sa ilang abilidad ang no. 3 seed Customs Intelligence and Investigation Service (CIIS) ni head coach Dione Edera batok sa sixth-seed Assessment Division ni coach Rady Abarintos sa usa ka gipaabot nga kulbahinam nga sangka atol sa nagpadayong Bureau of Customs (BOC) 1st Port of Cebu Sportsfest basketball tournament didto sa Benedicto College gym sa barangay Banilad, dakbayan sa Mandaue.

Ang laing luna sa semifinals paga-ilogan tali sa fourth-seed Sugbo Brokers batok sa no. 5 qualifier Chamber of Customs Brokers, Inc. (CCBI). Ang knockout semifinals pagahimuon sa Martes ug pagka-sunod adlaw adunay All-Star break sa dili pa ang finals.

Ang Customs Organic team ubos ni District Collector Atty. Ronnie Silvestre mopasundayag sa ilang katakos batok sa Brokers Selection nga gipangulohan ni Yoli Cena, ang presidente sa Cebu-Customs United Personeros Association (C-CUPA) isip highlight sa ilang torneyo. Tungod kay usa man lang kini ka exhibition game, ang tanang mga sakop sa duha ka teams nagpangedaron gyud og 35 years old above.

Ang piangon nga CIIS five tungod sa pagbiya ni ex-USC Warrior Danny Infantado, ang Danny I. sa Cebu (dili Danny Ildefonso) molarga padulong sa Canada karong adlawa aron mo-apas sa iyang asawang Canadian via Hongkong nga tua magtrabaho sa dakbayan sa Saskatchewan.

Apan may swerte lang gihapon ang CIIS tungod kay aduna pa sila'y nahibilin nga mga tang-an nga players nga mobahug batok sa Assessment sama kanila ni Gelran Gelbolingo, ang beteranong si Amay Palad ug ang mga abtik nga batan-on nga naglakip kanila ni George Giducos, Elmer Miscala, Chris Manulat ug Alvin Bonje.

Ang Assessment sa laing bahin, mosandig kanila ni Dondon Cadungog, Tata Laborte, Noel Medalle, Daniel Enriquez, Glenn Urbina ug Inting Bacalla. Gikahinaman ang maong sangka tungod kay halos parehas ka-balanse ang maong team apan mas pabor gamay ang CIIS nilang Edera ug assistant coaches Ricky Guibao ug Noel Torrecampo tungod kay mas lawom ang ilang bench gawas pa nga kumpare silang Edera ug Abarintos.

Sa laing bahin, ang Customs Organic team gilangkuban nilang Collector Silvestre, Mactan Collector Bingo Matugas, Atoy Bondoc, Feride Laraga, Jingjing Rama, Bong Mabalo, Boodee Monteño, Jan Mose, Abdel Sultan, Mamasao Capalan, Jerold Datu, Elmer Bailio, Edwin Lopez, Dione Edera ug duha ka Tagalog gikan sa Manila office nga sila si Macatangay ug Manahan.

Ang Brokers naglakip kanilang Cena, Janno Boniao, Taks dela Peña, Ewin Nadal, Roy Canillas, Art Gonzales, Roland Sala, Erlito Avenido, Renato Agustinez, Noel Dacumos, Charles Pabon, Takloy Moral, Gelran Gelbolingo, Amay Palad, Loreto Castillo ug Mike Logarta. – BANAT NEWS