Sixers mibahug ug 14 ka tres

CEBU, Philippines - Ang natagak na nga Philadelphia Sixers ni coach Eddie Jordan igo lang nagpakita sa ilang abilidad gikan sa three-point territory ug mihulog og 14 ka three-point bombs aron pagpukan sa natagak sab nga Memphis Grizzlies sa iskor, 120-101 sa nagpadayong aksiyon sa National Basketball Association didto sa FedEx Forum sa Memphis, Tennessee.

Labing menos lima ka Sixers ang mihakot og double figures pinangulohan ni Mareese Speights kinsa miposa og 22 puntos. Parehong midungag og 15 puntos sila si Andre Iguodala ug Jason Kapono, si Jodie Meeks may 14 puntos ug si Willie Green may 12 puntos alang sa Sixers kinsa naghupot ug 27-53 nga baraha.

Ang ilang 14 ka three-pointers nagtabla sa ilang franchise record. Ang Sixers naglabaw og 15 puntos pagsugod sa third period, 35-20 ug wala na kapugngi ang ilang pagmangtas gikan sa three-point area diin igo na lang sa paglingo-lingo sila si Rudy Gay ug mga kauban sa Memphis.

Ang Grizzlies gipangulohan ni Mike Conley kinsa mihakot og 23 puntos ug si Zach Randolph miamot og 19 puntos uban sa iyang 10 ka rebounds.

Si Gay ug si Darell Arthur parehong miabuno ug 14 puntos alang sa Grizzlies kinsa natagak na sa playoffs bisan pa sa ilang 40-40 nga baraha.

Duha ka players sa Sixers ang may koneksyion didto sa Memphis tungod kay si Rodney Carney gikan man sa University of Memphis ug si Thaddeus Young tua sab magpuyo sa Memphis.

Sa laing resulta sa NBA, midaog ang Charlotte Bbocats batok sa Detroit Pistons, 99-95, gidagit sa Atlanta Hawks ang Washington Wizards, 105-95, midaog ang Indiana Pacers batok sa New Jersey Nets, 115-102, gikulata sa Boston Celtics ang Milwaukee Bucks, 105-90, gilubong sa San Antonio Spurs ang Denver Nuggets, 104-85, gilubong sab sa Dallas Mavericks ang Sacrmento Kings, 126-108 ug midaog ang LA Clippers batok sa Golden State Warriors, 107-104. - BANAT NEWS