PTT-UV Lancers Nakatabla

CEBU, Philippines - Human sila gipakuratan sa opener, bangis nga mibawus ang PTT-UV Lancers batok sa Aerosol-USPF Panthers, 87-67, aron tablahon ang serye sa Game-2 sa ilang “best-of-three” series alang sa third place sa CESAFI Partner’s Cup didto sa Cebu Coliseum.

Naglabaw og 18 puntos sa halftime, 51-33, giyatakan pa sa Lancers ang Panthers sa final period sa pagpangulo nila ni Marl Señeres, Jerome Silva ug Jan Michael Auditor kinsa miamot sa ilang tagsa-tagsa ka triples aron hingpit nga biyaan ang Panthers.

Tungod sa dominante nilang kadaugan ang napunta karon sa Lancers ang momentum paingun sa Game-3 karong adlawa, diin aduna sila'y kahigayunan nga masakiyo ang ikatulong luna sa torneyo.

Si Auditor kinsa miposa sa kinatibuk-an niyang nuybe puntos sa final period, giabagan ni Señeris kinsa maoy leading scorer alang sa Lancers sa iyang 16 puntos. Si Edrian Lao midukdok usab og 15 puntos, samtang si Phil Mercader miamot og 13 puntos.

Ang naparot nga Panthers gipangulohan ni Fritz Dajalos sa iyang 20 puntos ug Ellison Rivera kinsa mi-iskor og 13 puntos.

Sa laing duwa, ang Ave Maria Sanctuary Park-USJR Baby Jaguars mitabla usab sa kaugalingon nilang "best-of-three" series batok sa Bibbo-CIT Wildkittens, 66-60, sa secondary division.

Mipabuto og 20 puntos si Philip Muñez alang sa Jaguars uban nila ni Gudeve Edu Autentico ug Venjie Trozo kinsa midugang og 15 puntos matag usa, samtang sai Wilkins Sanchez mi-ayag og 18 puntos ug si Franklyn Batiquin nga adunay 12 puntos alang sa Wildkittens.

Puntos matag usa:

Unang duwa:

Ave Maria-USJR (66)- Muñez 20, Trozo 15, R. Senining 9, Montecillo 6, Escatron 5, Senining 5, Legaspi 3, Alob 2, Tan 1

Bibbo-CIT (60)-Sanchez 18, Batiquin 12, Tejam 9, Limalima 6, Pamaong 2, Nalos 2, Autor 2, Jungoy 2, Bancale 2

Ikaduhang duwa:

PTT Fuels-UV (87)- Señeris 16, Lao 15, Mercader 13, Calo 10, Auditor 9, Silva 8, Cincoflores 6, Manigque 4, Perolino 4, Abad 2

Aerosol-USPF (67)-Dajalos 20, Rivera 13, Fuentes 8, Sereño 6, J. Ferraren 6, Bardillas 6, D. Ferraren 4, Durano 2, Cabahug 2. - BANAT NEWS