Girls division tangtang

CEBU, Philippines - Gitangtang ang girls division dihang usa lang ka team ang nikompirmar sa ilang partisipasyon sa 10th National Inter-Club Football Club nga gipasiugdahan sa Cebu Amateur Football Club (CAFC) karong Abril 24 hangtod sa Mayo 2 sa managlahing mga binyu dinhi sa Sugbu.

Si CAFC president Glenn Quisido nagkanayon nga bugtong ang Sacred Heart School-Jesuit ang nagpalista sa girls 17 hinungdan nga giwagtang ang maong kategoriya ning usa ka semana nga kompetisyon.

Daghan untang mga teams ang interesadong mosalmot, apan wala mopadayon kay kulang sa gidaghanon sa mga players nga rekisito alang sa 11-aside format.

Matud ni Quisido nga ang team kinahanglan langkuban og dili momenos 15 ngadto sa 20 ka players aron makaapil sa 11-aside format.

Ang laing mga kategoriya nga tigian mao ang 38-above, men's open, boys 17, 14 ug 12-under ug players 10 mix.   (BANATNEWS)