Ubos ang Pinoy cue artists

MANILA, Philippines - Pinigil ni Russian Rus­­tan Chinakhov ang pana­nalasa ni Jeffrey ‘The Bull’ de Luna matapos na pasarguhin ang Pinoy sa iskor na 10-5, sinilat na­man ni Karl Boyes ng Great Britain ang giant-kil­ler na si Venancio ‘Tukao’ Tanio, 10-5 at isa pang Briton--si Darren Appleton ang humiya sa snooker specialist na si Joven Alba, 10-8 nitong Biyernes ng gabi upang kumpletuhin ang pagbokya sa huling pag-asa ng Filipino sa   Etisalat WPA World 8-Ball Pool Championship 2010 sa Fujairah Ten­nis Club sa Fujairah, United Arab Emirates.

Ang pagkakasibak ng tatlo ang siyang tumapos sa kampanya ng Filipinos na magandang pagtatapos sa first World Championship ngayong taon.

Matatandaan na pi­nu­­westuhan nina Hall of Fa­mer Efren “Bata” Re­yes, Marlon “Marvelous” Manalo, Francisco “Django” Bustamante at Alex “The Lion” Pagulayan ang 1, 2, 3 at 4 position na kumumpleto sa dominasyon ng Filipinos sa inagurasyon ng nasabing event noong 2005.

Makalipas ang dalawang taong (2007), sina Ronato ‘Volcano’ Alcano at Dennis “Robocop” Orcullo kumuha naman ng 1-2 po­sition. 

Samantala, all-European ang magaganap na Finals makaraang ma­­talo si reigning World 8-ball champion Souquet 10-9, sa round-of-16, pi­n­a­­yuko naman ni Niels “The Terminator” Feijen ng the Netherlands si Andreas Roshkowski ng Germany,10-6, sa round-of-8 at si Appleton,10-6, sa round-of-4 upang isa­ayos ang kanilang titular showdown kontra kay Bo­yes.

Naunang tinalo ni Bo­yes si Stephan Cohen ng France, 10-6 patu­ngo sa semifinals ng torneong ito na unang idinaos sa mayamang bansa.