CEBU, Philippines - Gilauman nga mosaka pa ang gidaghanon sa triathletes nga mopakita'g aksiyon sa Cebu leg sa SPEEDO National Age-Group Triathlon Series nga gikatakda karong Abril 25 diha sa Plantation Bay and Spa sa Mactan Island.
Ning pagsulat, aduna nay 75 ka atleta ang nipadayag sa ilang partisipasyon.
Si Cebu leg director ug Danao City councilor Oscar 'Boying' Rodriguez Jr. miingon nga mga top triathletes gikan sa ubang nasud ang gipaabot nga mosalmot sa lumba nga maoy ilang himuon preparasyon alang sa Subic International Triathlon nga gitakda sunod buwan.
Si RP Iron Man champion Noy Jopson maoy mangulo sa local triathletes uban nilang Elmo Clarabal, Gerrie Calinawan, Ralph Arche ug Lorhiz Echavez.
Ang mga triathletes molangoy og usa ka kilometro, sundan sa 30 kilometro nga biking gikan sa Plantation Bay ngadto sa Cordova ug 7.5 kilometros nga dagan balik sa starting line.
Aduna kini registration fee nga P500, libre na ang Speedo t-shirts ug snacks. Mahimong magparehistro sa Speedo Shops sa Ayala ug SM City-Cebu, Rudy Project, David's Salon sa SM ug sa Philippine Sports Commission-VII office sa Cebu City Sports Center. – BANAT NEWS