CEBU, Philippines - Giharos sa Subangdaku Elementary School (SES) volleybelles ang kaatbang nilang Maguikay aron ugkaton ang boys ug girls titles sa 13-below category sa 3rd Mayor Jonas Cortes Cup 2010 volleyball tournament didto sa Mandaue City Cultural and Sports Complex (MCCSC) grounds.
Ang Subangdaku ni coach Dino Aribal nakabangon human masukamod sa second set aron pagmanso sa Maguikay sud sa tulo ka sets, 29-9, 23-25, 25-17 aron pagsakmit sa boys title.
Sila si Troy Merth Fehl Aribal, John Rey Arenasa, Christian Pullan, Jufael Oriño, R.A. Tecson ug Erwyn Lauro maoy mikugi og duwa alang sa kadaugan sa Subangdaku.
Sa girls division, ang Subangdaku wala kaayo mahago paglangkat sa korona human ilang gipilde ang Maguikay sud lang sa duha ka sets, 25-15, 25-121.
Si Rhea Christine Fuentes maoy nangulo sa Subangdaku uban nila ni Princess Ablon, Sarah Montejo, Joanna Rosalejos ug sa managsuong Honey Mae ug Honey Peach Repaja. – BANAT NEWS