Great Lapu-Lapu Run 2 hugopan sa mga tang-ang runners

CEBU, Philippines - Makabungog nga ganting salapi ang nagpaabot sa mga mananaog sa The Great Lapu-Lapu Run 2010 karong Abril 18 nga adto manukad ug matapos sa Liberty Shrine sa Mactan, Cebu.

Mga tang-ang runners dinhi sa Sugbu ug sa ubang bahin sa nasud ang gipaabot nga moapil sa ginukdanay sa kadalanan sa dakbayan sa Lapu-Lapu sayo sa buntag sa nahisgutang petsa.

Ang lumba sa 21K ug 10K mogamit og microchip, ang customized timing devise nga susama sa gigamit atol sa Cebu Marathon niadtong Enero.

Gawas sa 21K ug 10K races, may lumba sab sa 5K ug 3K.

“Ning tuiga, nagkadaku ug nagkanindot ang lumba," matud pa ni Lapu-Lapu City Tourism, Cultural and Historical Commissioner Hembler V. Mendoza atol sa press conference kagahapon didto sa Waterfront Airport Hotel and Casino, nga mao sab ang general manager sa maong hotel.  

 Si race director ug The Freeman sports columnist Raffy Uytiepo, mibutyag nga tungod sa kadaku sa premyo gibana-banang moabot ngadto sa 6,000 ka runners lukop nasud ang modagsa aron mosalmot sa labing dakung lumba sa Lapu-Lapu City.

Pipila sa mga ginganlan ni Uytiepo mao ang mga notadong runners nga sila si Rene Desuyo, Ben Alejandrino, Eric Panique, Cris ug Elmer Sabal ug 2-time gold SEA Games medalists   Vertex Buenavista.

Dili hinuon magpalupig ang mga pambato sa Sugbu nga sila si Mendel Lopez ug Kenyan missionary Simon Losiaboi ug andam kini manalipod sa ilang balwarte.

Sa 21K female open, masentro karon ang panagribal    ni Queen of the Road sa Sugbu nga si Mary Grace Delos Santos ug Aileen Tolentino, kinsa maoy mikampiyon sa Cebu City Marathon.

Mokompleto sa lista sa mga female contenders mao ang Sugbuanang si Madelyn Carter, Michelle Gilbuena, Maricel Maquilan ug Mary Joy Tabal. 

Adunay kapin o kulang P240,000 nga ganting salapi   ang giandam alang sa mga mananaog sa matag kategoriya. Ang kampiyon sa 21K mobulsa og P20,000, ang second placer makaangkon og P15,000, samtang ang   third placer makadawat og P10,000.

Gawas sa ganting salapi, ang makampiyon sa male ug female  sa 21K division makaangkon og katungod nga morepresentar sa Pilipinas alang sa Standard Chartered Hong Kong Marathon.

Ang top three finishers sa 10K run gantihan og P5,000,P4,000 ug P3,000 matag usa.

Ang registration fee alang sa 21K nagkantidad og P450, sa 10K nagkantidad P350 ug ang 5K ug 3K runs adunay registration fee nga P250

Ang entry forms mahimong makuha sa Philippine Sports Commission (PSC)-7 office sud sa Cebu City Sports Center, Runnr sa Ayala-Cebu, Casa Ilonga, Columbia sa SM Cebu ug sa Res Toe Run Ayala. – BANAT NEWS