CEBU, Philippines – Gatosan ka runners ang gilaumang managan karong Domingo sa pagsikad sa Cebu leg sa Pinay In Action (PIA) Run diha sa Asiatown IT Park, ning siyudad.
Gipasiugdahan ni Senadora Pia Cayetano, ang gibuak sa tulo ka kategoriya -- 3k, 5k ug 10k run.
Sa press conference kagahapon didto sa Waterfront Hotel and Casino, si Cayetano nagkanayon nga angay'ng hatagan og kahigayonan ang mga kababayen-an sa pagpakita sa ilang abilidad sa paugnat sa kusog.
Nanghinaot si Cayetano nga pinaagi sa PIA Run makita usab ang pisikal nga kapabilidad sa mga kababayen-an sa natad sa lumba.
Bisan og hatagan nila og prayoridad ang mga kababayen-an, wala sab nila bawali ang mga lalaki sa pag-apil sa maong lumba, apan gidasig sila sa mga organizers nga dad-on ang ilang mga paryente ug mga igsuong babaye.
Ang Cebu leg sa PIA Run mao ang katapusang hut-ong sa maong lumba. Ang duha ka nag-unang leg gilusad didto sa Manila ug Davao.
Kapin sa P30,000 ang gigahin nga ganting salapi alang sa mga mananaog sa matag dibisyon gawas lang sa 3k run.
Ang registration sugdan karon diha sa Active Zone sa Ayala Center-Cebu, Cebu City Sports Center ug sa Leona's Bakeshop-Mabolo.
Aduna kini registration fee nga P250 libre ang race singlet.
Ang deadline sa registration kutob lang karong Biyernes. - Lemuel P. Maglinte (BANAT NEWS)