Great Lapu-Lapu Run 2 mogamit og timing chips

CEBU, Philippines -  Ang labing dakung lumba sa dakbayan sa Lapu-Lapu, ang "The Great Lapu-Lapu Run 2," mogamit og "timing chips" alang sa 21k ug 10k open karong Abril 18 diha sa Mactan Shrine.

Sama sa nagmalampusong Cebu City Marathon niadtong Enero, ang mga tigpasiugda nga si triathlon king Noy Jopson ug The Freeman sports columnist Raffy Uytiepo mihukom nga mogamit usab og "timing chips" o RFID (Radio Frequency Identification) chips.

Ang mga chips nga ibutang sa sapatos sa mga runners dakung tabang aron makuha ang tukmang oras sa usa ka runner ug aron sayon na lang sab sa mga technical committee nga kuhaon ang oras sa mga midaog.

Tungod sa maong kalambuan gibana-banang kapin sa 5,000 runners ang mosalmot. Gawas sa 21k ug 10k run, may 5k ug 3k sab alang sa fun runners.

Ang "The Great Lapu-Lapu Run " mitagana og kapin sa P240,000 nga ganting salapi aron iapod-apod sa mga mananaog.

Ang top male ug female runner sa 21K maoy ibala alang sa Standard Chartered Hong Kong Marathon.

Ang "The Great Lapu-Lapu Run" magsilbe usab nga kick-off event sa nagsingabot nga kasaulogan sa “Kadaugan sa Mactan” Festival.

Aduna kini registration fee nga P450 sa 21K, P350 sa 10K ug P250 sa 5K ug 3K.

Niadtong mga interesado, mahimong magparehistro diha sa PSC Office sud sa Cebu City Sports Center, Runnr sa Ayala Mall, Casa Ilonga, Columbia sa SM-Cebu, ug sa Res Toe Run-Ayala.    (BANATNEWS)