Timeout basketball clinic sa Lunes na

CEBU, Philippines - Ang tinuig nga Timeout Summer Basketball Clinic ipahigayon sa nagkalain-laing mga binyu sugod karong Abril 5 diha sa Compostela Sports Complex.

Magsugod ang training session sa ala-1 hangtod sa alas-3 sa hapon alang sa beginners level ug alas-3 hangtod sa alas-5 sa hapon sa advance.

Sa sunod adlaw, ang Consolacion mo-host sa training camp nga pangulohan ni Cebu Gems asst. coach Rex Salvaña diha sa Jugan gym gikan sa alas-8 hangtod sa alas-10 sa buntag alang sa beginners ug alas-10 sa buntag hangtod sa alas-12 sa udto alang sa advance level.

Ang Timeout Clinic pormal nga buksan karong Abril 9 diha sa Cebu Coliseum. Ang inadlaw'ng training regimen sugdan sa alas-8 hangtod sa alas-10 sa buntag alang sa beginners ug alas-10 sa buntag hangtod sa alas-12 sa udto sa advance.

Ang Timeout mosentro sa fundamentals sa basketball sama sa proper passing, dribbling, shooting ug footwork.

Moabag ni Salvaña ning usa ka bulang training camp mao ang mga kanhi commercial stalwarts sama nila ni Aldrin Barola, Bobog Alocillo, Bong Abad, Reggie Licanda ug Teroy Albarillo.

Ang registration fee sa maong clinic bukas sa mga aspiring hoopsters nga nagpangedaron og 7-anyos nagkantidad og P1,200 libre na ang basketball ug training jersey.

Alang sa dugang mga kasayoran sa maong training camp, mahimong motawag sa 0905-6554203 ug 0933-4675922. – BANAT NEWS