CEBU, Philippines - Gilubong sa topseed Creekside ang karibal niining Itom Yuta, 105-82 aron angkonon ang Game-1 sa ilang “best-of-three” semifinals series sa SK-FDH Hoopfest didto sa Mayors Satellite Sports Complex sa Brgy. Lorega, ning siyudad.
Gumikan niini, ang Creekside nagkinahanglan na lang og usa ka daog aron moabante ngadto sa finals.
Ang managsuong Jaime ug Wilson Villaceran nagkumboya og 56 puntos aron pangulohan ang Creekside.
Si Jaime miposa og 32 puntos, samtang si Wilson mibugha og 24 puntos.
Ang pilderong Itom Yuta gipangulohan sab ni Jeffrey Paler pinaagi sa iyang 25 puntos, samtang sila si Raymund Villaflor ug Pastor Amorado miamot og 14 puntos matag usa.
Sa laing duwa, midaog sab ang Lawis pinaagi sa forfeiture batok sa San Miguel-A sa Game-1 sa kaugalingon nilang best-of-three series. - Lemuel P. Maglinte (BANAT NEWS)