CEBU, Philippines - Walay laing tumong ang topseeds Ave Maria Sanctuary Park-USJR Jaguars ug ang San Marino Corned Tuna-USC Warriors kun dili ang pagsakmit og luna sa finals sa ilang pakigsangka batok sa tagsa-tagsa nila ka karibal sa Game-2 sa "best-of-three" semifinal series sa pagpadayon sa 4th CESAFI Partner’s Cup karong adlawa diha sa Cebu Coliseum.
Sa dili pa ang ilang sangka, ang high school top qualifier Enervon C-UC Junior Webmasters ug fourth-seed Ave Maria-USJR Baby Jaguars magtigi pag-usab aron maoy moila kun kinsa tali kanila ang makaangkon og katungod sa pakigsangka batok sa PTT Fuels-UV Baby Lancers alang sa finals.
Usa na lang ka daog ang kinahanglan sa Jaguars ug sa Warriors aron sila na maoy magbagat sa Partner’s Cup finals sa labing unang higayon.
Niadtong Domingo, ang no. 1 seed Jaguars nakalingkawas gikan sa hulga gikan sa fourth-ranked Aerosol-USPF Panthers pinaagi sa pag-iskor og 83-70 nga kadaugan, samtang ang Warriors mi-iskor og 105-94 nga kadaugan batok sa PTT Fuels-UV Lancers.
Gawas lang og adunay ikapakitang milagro ang Panthers, ilang mapugngan ang 2-0 sweep nga gitinguha sa Jaguars.
Lahi ang mahitabong gubat tali sa Warriors ug Lancers tungod kay dili yanong moyukbo ang naulahi sa mga importanteng sangka ilabi na kun duna pa kini laing alas nga gihuptan.
Ang pagpilde sa UV dili na bag-o alang sa Warriors tungod kay nahitabo nang nag-abot sila sa CESAFI finals duha ka higayon apan pakyas sila sa ilang kampanya. – BANAT NEWS