Fernandez III padayong namupo og awards sa judo competition

CEBU, Philippines - Mihakot og laing award ang Cebuano judoka nga si Vicente 'Nonoy' Fernandez III human siya mipakita og dalaygong performance sa 2010 Hong Kong International Judo Tournament didto sa Shek Kip Mei Sports sa Kowloon, Hong Kong.

Ang umaabot nga senior Public Administration student sa University of the Philippines-Diliman nakadawat usab sa “Maroon Jacket Award” atol sa Varsity Letter Awards sa UP niadtong Marso 13, 2010.

Ang maong pasidungog ihatag sa UP ngadto sa ilang mga tinun-an nga nahimong “Outstanding Athlete of the Year” sa tulo ka sunod-sunod nga higayon.

Si Fernandez, 19-anyos nahimong outstanding athlete sa judo sa tuig 2007, 2008 ug 2009 sa naasoy'ng unibersidad.

Ang iyang amahan nga si Fernandez II,   nagkanayon nga bisan og ikalima lang ang iyang anak sa 66 kgs. category, daghan gihapon ang midayeg tungod sa impresibong labok batok sa iyang mga kontra.

Ang presidente sa Central Visayas Judo Association nga si Fernandez II, nagkanayon nga daling gidispatsar sa iyang anak ang mga kontra lakip na ang pambato sa Japan.

Si Fernandez III, kinsa usa sa mga major awardees sa 28th Sportswriters Association of Cebu-San Miguel Beer (SAC-SMB) All-Cebu Sports Awards, gilaumang makadawat usab og plaque of recognition gikan sa Universities Athletic Association of the Philippines alang sa iyang kalampusan sa Hong Kong ug Korea judo competitions.

Si Fernandez III midaog sab sa 2009 National Juniors Judo Championship.

Pipila sa mga awards nga natigom ni Fernandez III   mao ang duha ka gold medals sa Batang Pinoy 2002 ug 2nd Philippine Olympic Festival didto sa Iloilo, silver medals sa Philippine National Junior Judo Championship ug sa 2nd Philippine Olympic Festival sa Manila.

Midaog sab siya og duha ka bronze medals sa 2008 UAAP ug National Juniors   Championship didto sa Manila. – BANAT NEWS