Yong Larrazabal mirehistro personal best time record

CEBU, Philippines - Ang running doctor sa Sugbu nga si Yong Larrazabal mirehistro og personal best time record 3:47.22 sa iyang pagsalmot sa 81st Dong-A International Marathon didto sa Seoul, South Korea.

Sa iyang pakighinabi sa mga sportscribes sa miaging gabii didto sa Casino Español de Cebu, si Larrazabal miasoy nga lisud ang kasinatian nga iyang nabagatan sa labing dakung international marathon sa Asia.

Gawas sa bugnaw nga klima, giatubang usab ni Larrazabal ang hugot nga kompetisyon batok sa kapin sa 20,000 elite runners gikan sa Korea, Japan ug Kenya.

Apan bisan pa niini, si Larrazabal malampusong mitapos sa 42K marathon ug mikulit sa labing paspas niya nga oras sulod sa 11 ka international marathon nga iyang nasalmotan.

Human sa Korea Marathon, si Larrazabal mangandam alang sa iyang pagsalmot sa San Diego Rock and Roll Marathon   karong bulan sa Hunyo, United Kingdom ug Camsur sa Septiyembre ug sa Singapore Marathon sa Disyembre.

Kabahin sa iyang tinuig nga Cebu Doctors University (CDU) Run, si Larrazabal naglaraw nga himuon kini niyang usa ka Inter-University Run aron makasalmot ang uban pa nga mga estudyante gikan sa naglain-laing mga unibersidad dinhi sa Sugbu. – BANAT NEWS