CEBU, Philippines - Nakalingkawas gikan sa makutas nga duwa ang VKK Divers human nila gipilde ang Tango, 95-93 ug aron sab pagsakmit sa titulo sa LLBA-ABA Fiesta Cup 2010 basketball tournament didto sa Agus gym sa Lapu-Lapu City.
Hinugtanay sa bakus ug parehong mipauwan og mga puntos inubanan sa hugot nga depensa ang gipakita sa duha ka kampo nga miresulta sa panagtabla paghuman sa unang 10 minutos sa duwa, 24-all.
Padayong nagsinukliay og mga puntos ang matag habig hangtod nga ang VKK Divers sa kombinasyon nilang Jun Silawan, Buldog Ybañez, Glenn Aying ug Sammy Lapoja nakakita'g buslot sa depensa sa Tango nga naghatag kanila og kahigayonan pagpalusot sa ilang mga tirada aron lawgan ang iyang koponan og tres puntos nga bentaha sa halftime, 47-44.
Naglabaw na unta ang Tango sa third period, apan si Lapoja mipasulod og tulo ka triples alang sa VKK Divers aron tukbon og balik ang labaw.
Gikan niadto, ang VKK Divers maampingon na sa ilang duwa hangtod nga naangkon ang tres puntos nga kadaugan.
Si Silawan mi-iskor og 21 puntos aron pangulohan ang VKK Divers, gisundan ni Ybañez, kinsa maoy napiling MVP nga miamot og 20 puntos, si Aying miabuno og 16 puntos, samtang si Lapoja misansan og 10 puntos.
Ang pilderong Tango gipangulohan ni Dandan Ramos pinaagi sa iyang 25 puntos. Si Warren Cangsuco midiga og 16 puntos ug si Kirby Gutib mihirit og 12 puntos sa maong kapildihan.
Puntos Matag Usa
VKK DIVERS (95) - Silawan 21, Ybañez 20, Aying 14, Lapoja 10, Paquibot 9, Dignos 8, Portugaliza 4, Malingin 4, Lamoste 4, Hiyas 2
TANGO (93) - Ramos 25, Cangsuco 16, Gutib 12, Ceniza 9, Belga 9, Cuadra 8, Pardillo 4, Jornales 5, Ouano 3, Fuentes 2. – BANAT NEWS