DGL nangharos sa Autocross

CEBU, Philippines - Gidominar sa DGL Motorsports ang 1st leg sa Philippine Autocross Championship niadtong miaging adlaw didto sa Parkmall carpark sa siyudad sa Mandaue.

Ang DGL Motorsports ni defending champion David G. Lim mao ang miharos sa titulo sa nagkadaiyang mga kategoriya --All-front Wheel Drive, All CRX class, Experience Stock C ug Open C class.

Gawas ni Lim, mipakita usab sa ilang katakus ang ubang top drivers dinhi sa Sugbu sama nila ni Jong King sa Team No Care Racing (NCR) ug sila si Erik Arculli ug Justin Neri sa Kartzone.

Uban ni Lim nga mihatag og daog alang sa DGl mao si Mato Ton, kinsa maoy nanghawod sa Open C class sa iyang oras nga 38.34 seconds, samtang si David Lim Jr. misakmit og tulo ka titulo sa Last class, All Honda Class ug All Automatic class.

Sa laing bahin, wala usab magpaulahi ang Team NCR nga mipupo og 11 ka titulo sa pagpangulo ni King, kinsa mihakot og pito ka tropeyo.

Mikompleto sa mga midaog alang sa Team NCR mao si Robert Pangilinan, ang second placer sa automatic class, Alan Choachuy sa experience stock C, Anthony Khe, ang third placer sa all-Toyota class. Si Phillip Khan Lim sa experience stock ug Dennis Corro sa Team Race category. – BANAT NEWS