Losiaboi wala na makapiog ni Lopez

CEBU, Philippines - Nalupigan sa Sugbuanong si Mendel Lopez ang Kenyan missionary Simon Losiaboi atol sa duha ka lumba niadtong Sabado ug Domingo sa managlahing mga binyu.

Si RP Team member   Lopez nidominar sa 5th Paghandum ni Magsaysay (PNM) Adventure Race niadtong Sabado didto sa Mount Manunggal, diin naapsan niya si Losiaboi, kinsa mipahiluna sa ikaduhang dapit, samtang si Jobert Carolino ang misakmit sa ikatulong dapit.

Nausban kini niadtong Domingo atol sa Run to the Clouds didto sa Zipline sa Busay, diin si Lopez maoy mipatigbabaw batok ni Losiaboi sa 8K men’s race. Si Lopez, ang third placer sa miaging 21K Hong Kong Marathon, nag-una og kuwatro minutos sa finish line una pa miabot si Losiaboi.

Dili kini ang unang higayon nga gipilde ni Lopez si Losiaboi kay atol sa Rotary Run niadtong miaging bulan, nakuha sa Sugbuanon ang titulo human na-disqualify ang Kenyan runner tungod sa pag-ilis niini og race number nga wala magpahibalo sa technical committee.

Hinuon, si Losiaboi mirason nga ang injury sa iyang tuhod maoy hinungdan sa bati niyang performance sa duha niya ka lumba.   (BANATNEWS)