Baby Lancers nakauna sa series

CEBU, Philippines -  Nakabawos ang PTT Fuels-UV Baby Lancers pinaagi sa pag-iskor 86-71 nga kadaugan batok sa Bibbo-CIT Wildkittens aron pagbaton og 1-0 sa ilang "best-of-three" semifinal series secondary division sa 4th CESAFI Partner's Cup kagahapon didto sa Cebu Coliseum.

Ang Wildkittens maoy responsable sa pagpalagpot sa Baby Lancers sa finals sa miaging tuig nga CESAFI season.

Nakabawi ang Baby Lancers gikan sa 29-40 nga alkanse sa halftime dihang sila si Gerald Legarde ug Edcor Marata Jr. nga maoy nangulo sa pagpangataki sa fourth period nga nagkumboya og 21 puntos.

Si Vincent Mendoza, kinsa maoy topscorer alang sa Baby Lancers uban ang 20 puntos, daku sab og natabang sa mainitong rally ug ingon man ang tandem nilang Francisco Arong ug Eugene Nuñez nga nagkumboya og 18 puntos.

Ang Wildkittens mao gihapon ang nag-una sa pagsugod sa final period sa basket ni Wilkins Sanchez, apan nausab ang dagan sa duwa dihang wala na moduwa ang ilang star player Mark Jayven Tallo, kinsa aksidenteng nadakin-as sa midcourt samtang nag-backpedalling alang sa defensive stance.

Si Tallo, kinsa gidala sa Chong Chua Hospital aron matambalan, giingong adunay gipamati nga flu, apan niduwa kini aron tabangan ang iyang koponan. Tungod sa iyang kalapoy, wala kini makabalanse ug nahagsa sa sawog ug gipahigda kini sa stretcher sa Emergency Rescue Unit Foundation (ERUF) personnel.

Dihang wala na si Tallo, ang Wildkittens hinay-hinay nga misukarap ug wala na makarekober dihang ang ilang mga itsa sa gawas mikagar na hinungdan nga ang nailog sa Baby Lancers ang momentum hangtod na sa pagkahurot sa oras sa duwa.

PUNTOS MATAG USA

PTT-UV (86) - Mendoza 20, Marata 13, Legarde 12, Arong 10, Nunez 8, Ybanez 4, Regner 4, Linao 4, Suan 3, Undaloc 2, Smith 2, Dennison 2, Flores 2

Bibbo-CIT (71) - Sanchez 13, Nalos 11, Tallo 8, Tejam 7, Limalima 7, Batiquin 5, Jungoy 5, Bancale 5, Gera 4, Pamaong 2, Autor 2, Velez 2   (BANATNEWS)