Cobra binitbit ang Cossack Blue sa semis
MANILA, Philippines - Kumpleto na ang Final Four ng 2010 PBL PG Flex-Erase Placenta Cup.
Ito ay matapos talunin ng Cobra Energy Drink ang talsik nang Fern-C, 88-82, upang bitbitin ang sister team na Cossack Blue sa semifinal round kahapon sa Ynares Sports Arena sa Pasig City.
Tinapos ng Ironmen ang elimination round na may 5-2 kartada kagaya ng Excelroof 25ers sa ilalim ng Pharex B Complex Fighting Maroons (6-1) kasunod ang Spirits (4-3).
Sa ikalawang laro, pinayukod naman ng AddMix ang Cossack, 88-53, tampok ang 12 marka ni Gio Ciriacruz.
Sa Final Four, makakatapat ng No. 1 Pharex ang No. 4 Cossack, samantalang makakaharap naman ng No. 2 Cobra ang No. 3 Excelroof na kapwa taglay ang ‘tweice-to-beat’ advantage.
Isang panalo lamang ang kailangan ng Fighting Maroons ni Aboy Castro at Ironmen ni Lawrence Chongson upang itakda ang kanilang best-of-three championship series.
Muling nagbida si Patrick Cabahug para sa Cobra nang tumipa ng game-high 25 puntos at 7 rebounds kasunod ang tig-20 marka nina Paul Lee at Parri Llagas, humakot ng 14 boards.
Ngunit hindi pa kuntento si head coach Chongson sa ipinakita ng kanyang Ironmen.
“It was a struggle but somehow we got there. But our play still needs so much to be desired,” ani Chongson. “I don’t know but I’m trying to work on it but then somehow we managed to survive against some of the top teams in the tournament.”
Ikinasa ng Cobra ang isang 19-point lead, 67-48, mula sa basket ni Lee sa huling 29 segundo sa third period hanggang makabangon ang Fern-C sa 61-69 agwat sa 7:06 ng fourth quarter.
Sinandigan ng Ferntastics ni mentor Bal David sina John Wilson at Yuri Escueta sa naturang paglapit.
Dalawang three-point shots ang isinalpak ni Cabahug bukod pa ang isang freethrow para muling ilayo ang Ironmen sa 76-61 sa huling limang minuto ng laro.
Umiskor si Wilson ng 12 puntos mula sa malamya niyang 4-of-15 fieldgoal shooting makaraang magposte ng average na 28 puntos kada laro sa anim na laban ng Ferntastics.
COBRA 88 - Cabahug 25, Lee 20, Llagas 20, Sarangay 12, Reyes 7, Mangahas 4, Hayes 0.
FERN-C 82 - Escueta 18, Dizon 17, Wilson 12, Evangelista 12, Miranda 10, Espiritu 5, Co 3, Walsham 2, Tanuan 2, Maconocido 1, Maurillo 0, Semira 0.
Quarterscores: 24-14; 39-31; 67-52; 88-82.
ADDMIX 88 - Ciriacruz 12, Nuyles 11, Morial 11, Margallo 10, Canada 8, Lozada 6, Ynion 6, Galinato 6, Alvarez 5, Amparado 5, Colina 4, Guillermo 2, Cubo 2.
COSSACK BLUE 53 - Martinez 13, Zamar 8, Reyes 6, Saguindel 6, Simpson 5, Etrone 4, Taganas 4, Afable 2, Duran 2, Morillo 2, Flores 1, Noble 0.
Quarterscores: 16-11; 34-26; 66-40; 88-53.
- Latest
- Trending
