GAA Selection milubong sa CECABA All-Star

CEBU, Philippines - Ang shooting guard nga si Vicente 'Inting' Reyes miburak og 28 puntos, lakip na ang lima ka triples aron pangulohan ang Guadalupe Athletics Association (GAA) Selection sa pag-iskor og 109-97 nga kadaugan batok sa CECABA All-Star nga gipangulohan ni Chester Cokaliong atol sa ilang exhibition game didto sa City Sports Club-Cebu gym sa Cebu Business Park.

Tungod sa talagsaon performance nga iyang gipakita, si Reyes maoy napili isip MVP.

Ang GAA Selection ni playing coach Dr. Boy Te nagsugod og arangkada didto na sa ulahing bahin sa third period diin sila milabaw sa labing unang higayon ug mao na ang nidiktar sa duwa.

Katapusang nakalabaw ang CECABA Stars sa iskor nga 75-73 human sa triple ni Richard Lanutan sa nahabiling tres minutos sa third period kay si Reyes misukli sab og triple aron pangulohan ang 13-0 rally nga naghatag sa GAA og 14 puntos, 89-75 sa sayong bahin sa fourth period.

Ang CECABA mihulga sa katapusang higayon, 83-95 pinaagi sa back-to-back triples ni Cokaliong, apan ang GAA Selection nagpabiling lig-on sa ilang depensa.

 Si Cokaliong, kinsa mipauwan og unom ka triples maoy nangu sa CECABA pinaagi sa iyang 22 puntos, samtang sila si Wilson Yu, Chris Cokaliong, Richard Yu ug Joel Chan mirehistro sab og double figures.

Puntos Matag Usa

GAA (109) - Reyes 28, Ocampo 18, Hernandez 13, Sasing 12, Perez 11, Minoza 8, Bamba 6, Cabanilla 5, Noel 4, Sollano 4

CECABA (97) - C. Cokaliong 22, W. Yu 14, Cokaliong 12, R. Yu 11, Chan 10, Kaw 9, Tan 7, Sia 6, Mendez 2. – BANAT NEWS