Enriquez gipailawom sa cervical spine surgery

CEBU, Philippines - Gipailawom sa cervical spine surgery kagahapon ang Sugbuanong basketbolista nga si Woodrow Enriquez diha sa Chong Chua Hospital diin siya nalandig sa tambalanan human sa dautang pagtagak niya sa sawog ug wala kini molihok sud sa pipila ka minutos atol sa ilang exhibition game batok sa Alaska Aces niadtong Biyernes sa gabii diha sa University of San Carlos (USC)-main gym.

Si Pio Solon, ang team physical therapist sa M. Lhuillier Kwarta Padala-Cebu Niños, miingon nga nagmalampuson ang maong operasyon nga milanat og tulo ka oras.

Segun sa nurseonline.org, nga ang cervical spine injuries mao ang mga injuries sa cervical spine nga mas kuyaw kay sa panahon sa trauma   makamugna kini og grabeng neurologic problem ug ang presensiya sa edema ug panghupong nga makapalyar sa spinal cord function. 

Basi sa obserbasyon, si Solon nagkanayon nga "conscious" ug stable na ang vital signs ni Enriquez.

Sa linaing interbiyu, ang asawa ni Woodrow nga si Cathy Enriquez miingon nga ang katunga nga bahin sa lawas sa iyang bana dili makalihok.

Atol sa ilang duwa batok sa Alaska, diin sila nidaog sa iskor nga 88-87, si Enriquez na out-balanced ug nahagba ubos sa basket sa katapusang 2:23 sa third period. Napahigda kini sa korte sud sa pipila ka minutos sa wala pa siya ibalhin sa stretcher sa ERUF personnel paingon ngadto sa Chong Chua Hospital.

Si Enriquez, bag-o lang nidawat og major award tungod sa iyang pagka maayong moduwa sa basketbol atol sa 28th Sportswriters Association of Cebu-San Miguel Beer (SAC-SMB) All-Cebu Sports Awards niadtong Huwebes sa gabii didto sa Casino Español de Cebu.    (BANATNEWS)