CEBU, Philippines - Ang Sugbuanong seklista nga si Igi Maximo, kinsa bag-o lang misidlak sa maong natad sa paugnat sa kusog gidapit sa paglumba didto sa Estados Unidos.
Si Maximo kursonada kaayo nga mosalmot, apan mag-agad pa kini sa pundo nga iyang matigom alang sa mga kalihukan didto sa US karong summer.
Daghang mga Fil-Ams lakip na ang Sugbuanon ug atua na karon sa US nga si Frank Gatdula, kinsa maoy utok sa Tour Ni Frank nagkanayon nga ang batan-ong si Maximo, 14-anyos, mahimong moapil og road races, criteriums ug club rides didto sa California ug ingon man junior development camp.
Nagsugod si Maximo sa cycling niadtong Nobiyembre 2009 ug ang iyang unang lumba mao ang Tour Ni Frank niadtong Enero 23-24, 2010.
Sa laing bahin, ang amahan ni Igi nga si Jonathan, ang presidente kaniadto sa Cebu Football Association, nagkanayon maglaum siya nga adunay junior cycling school nga matukod dinhi sa Sugbu aron makakaplag og masaaron ug batan-ong mga seklista.
Tungod sa kakulang og exposure ug training program alang sa mga batan-ong seklista dinhi sa Sugbu, si Igi Maximo moadto pa sa Manila aron pagsinati sa racing sa makiangayon nga playing field ug pagbaton og kahibalo sa uban pang mga techniques gikan sa mga beteranong racers sa Luzon.
Kahinumduman, si Igi bag-o lang mikulit og sunod-sunod nga kadaugan sa junior division sa 2010 Philippine Premiere Cycling League (PPCL) nga maoy nakakabig sa katawhan sa cycling community lakip na niadtong tua sa abroad. – BANAT SPORTS