Sports personalities dinhi sa Sugbu pabor ni Pacquiao

CEBU, Philippines - Nagkahiusa ang mga inilang sports personalities dinhi sa Sugbu uban ang ilang panahom nga segurado gyud modaog si Manny Pacquiao sa iyang sangka batok ni Joshua Clottey karong Marso 13 (petsa 14 dinhi sa Pilipinas) didto sa Dallas Cowboys Stadium sa Arlington, Texas.

Ang Sugbuanong boxing promoter ug suod nga higala ni Pacquiao nga si Rex 'Wakee' Salud, nagkanayon nga kutob ra sa seventh round ang African challenger nga si Clottey. Si Salud uban sa Team Pacquiao milarga ngadto sa Dallas aron personal nga mosaksi sa away sa iyang higala.

Si Antonio 'Bidoy' Aldeguer, ang founder sa ALA Boxing Gym, namahayag sab nga dili katupngan ni Clottey ang kapaspas ug kusog sa seven-division world champion nga si Pacquiao. 

Napanglantawan ni Aldeguer   nga dili kaabtan og eight round si Clottey.

Ang anak ni Antonio nga si Michael Aldeguer, ALA Promotions president, nagkanayon usab nga adunay posibilidad nga moabot sa round 12 ang away, apan si Pacquiao gihapon ang mopatigbabaw pinaagi sa "unanimous decision."

Sila si Cebu South District councilors Raul 'Yayoy' Alcoseba ug Sylvan 'Jack' Jakosalem pulos usab mipahungaw sa ilang panahom nga bisan pa sa kalig-on ug pabor sa gidak-on ni Clottey, motikangkang gihapon kini batok ni Pacquiao.

Si Jun Ablaca, usa ka Sugbuanong trainer, walay pupanaganang miasoy nga sayon lang alang ni Pacquiao ang sangka batok ni Clottey.

Dugang ni Ablaca nga sa round five, atngan niya ang pagkalup-og ni Clottey ibabaw sa ring. – BANAT NEWS