CEBU, Philippines - Nalupigan sa Brgy. Apas ang abilidad sa defending champion Brgy. Mambaling sa 10th leg sa Go Ching Hai-Martina Cup-M.Lhuillier Kwarta Padala Cup-Season II dance competition didto sa Zapatera Elementary School gym.
Ang Apas mikolekta og duha ka golds, usa ka silver ug duha ka bronze sa pagpangulo nila ni Crispin Sato ug Maria Luiza Delda sa standard juvenile ug nilang John Phillip Fantoniala ug Mae Paracuelles sa juniors division.
Napakyas ang Mambaling pagkuha sa titulo alang sa standard youth open maong nalagpot sila sa ikaduhang dapit bitbit ang usa ka gold, tulo ka silvers ug duha ka bronzes
Ang tandem nila ni Shardie Baydal ug Disiree Matas maoy mihatag og bulawan alang sa Mambaling pinaagi sa standard youth division, samtang sila si Giovannie Carlo ug Wendlyn Jane Estenor misakmit sa silver ug ang Jon Maurice Bahena-Niza Zanoria tandem mihakot og bronze.
Ang Brgy. Ramos mitapos sa ilang kampanya bitbit ang 1-1-1 medal count.
Sila si Roy Cabanlit ug Hanzel Ann Jumamoy midominar sa latin youth open aron tunolan og bulawan ang Ramos.
Ang Pasil mikabkab sab og bulawan pinaagi nilang Ralph Vincent Elarcosa ug Ianah Page Silud sa latin juvenile class, samtang ang Buhisan sa pagpangulo nila ni Rheniel ug Katrina Jabonero mihakot og bulawan sa latin junior class.
Sa closed competition, sila si Gyle Diluvio ug Kim Capangpangan sa Ramos nakakuha og duha ka golds sa juvenile division. Sila si Jefrey Yape ug Hanzel Ann Jumamoy nanghawod sa youth class, samtang sila si Gerald Llanos ug Goldie Sumayang mao sab ang hawod sa junior level.
Ang Zapatera Night High School maoy nakampiyon sa hip-hop event. (BANATNEWS)