Enervon C kaging sa Aerosol

CEBU, Philippines - Giusikan sa no. 5 seed Aerosol-USPF Panthers ang ilang 15 puntos nga abante sa halftime apan naka-ipsot gihapon kini pinaagi sa pag-iksor og kulbahinam nga 67-63 nga kadaogan batok sa no. 4 qualifier Enervon C-UC Webmasters aron pagpugos og playoff sunod semana atol sa ilang sangka sa quarterfinals sa nagpadayong CESAFI Partner’s Cup kaniadtong Sabado didto sa Cebu Coliseum.

Sa sayo pa, ang second seed San Marino Corned Tuna-USC Warriors mipakgang sa no. 7 seed Bibbo-CIT Wildcats, 78-68 aron mo-abante ngadto sa semifinals apan dili sa sayon nga paagi tungod kay didto na sa fourth quarter nila hingpit nga gipadaplin ang Wildcats nga gipangulohan ni Chester Curso kinsa mibahug og game-high 25 puntos.

Ang Panthers kinsa napilde sa Webmasters pipila lang ka adlaw ang milabay, 72-74 tungod ra usab sa ilang defensive breakdown sa kataposang sayis segundos, adunay higayon nga maoy mo-abante sa semifinals kung ilang pildehon og usab ang Webmasters sunod semana.

May swerte lang ang Webmasters sa ilang pagkapilde tungod kay naghupot sila ug twice-to-beat incentive ug mao na sa ginhawa nilang paningkamot aron kini masakmit gikan ra usab sa paghulga sa Panthers.

Didto na sa pagkahuman sa third period milabaw sa labing unang higayon ang Webmasters, 44-43 human sa duha ka free throws sa ilang 6-9 nga sentro nga si June Mar Fajardo diin sila nakamaneho og 10-3 run sa kataposang tres minutos sa nahisgotang period diin milampos sila’g papas sa 32-17 nga halftime lead sa Panthers.

Sa tibuok fourth period, nagpuli-puli og labaw ang Panthers ug ang Webmasters diin nag-agi kining lima ka deadlocks sa wala pa masakmit sa Panthers ang liderato human sa basket ni Dennis Ferraren, 65-63 may 34 segundos pa ang nahibilin sa duwa. Human mosipyat si Moncrief Rogado sa iyang attempt aron unta tablahon pag-usab ang duwa, tuyong gi-foul ni Kelvin Juliane sa UC si Elvis Labares aron hunongon ang oras ug pareho nang penalty ang duha ka kampo.

Misipyat sa iyang usa ka free throw si Labares ug naglabaw pa ang Panthers og tres puntos, 66-63 apan kalit nahanaw ang paglaum sa Webmasters sa labing menos paghatod sa duwa ngadto sa overtime dihang pakyas si Fajardo paglangkat sa rebound tungod kay ang mas mubo kaniya nga si Christian Tinoy maoy nakakuha sa offensive rebound sa kataposang tres segundos ug si Tinoy maoy naghatag sa 67-63 nga iskor.

Si Ellison Rivera miposa og 15 puntos aron pangulohan ang Panthers samtang midugang og 11 puntos si Labares kinsa maoy labing beterano ug sinaligang player ni coach Raul Latonio, Sr.

Si Rogado nga kanhi usa ka Panther ug maoy nagsalbar sa UC sa ilang 74-72 nga kadaogan sa miaging mga adlaw, maoy nangu sa Webmasters sa iyang 16 puntos ug si Fajardo mihakot ug 12 puntos.

Sa sayo pa, si Giovanni Padillo mi-iskor sab og 16 puntos aron pangulohan ang Warriors ug si Sam Hermosa midugang ug 10 puntos.

Ang quarterfinal games mopadayon sunod semana diin ang PTT Fuels-UV Lancers ug ang Baby Lancers mosuway ug sakmit ug luna sa semifinals diin pareho sab silang naghupot og twice-to-beat incentives.

Puntos matag usa:

First Game:

San Marino-USC (78)— Padillo 16, Hermosa 10, Cortes 9, Panerio 7, Cantonao 6, Santos 6, Duran 6, Bakker 4, Otida 3, Uy 2

Bibbo-CIT (68)— Curso 25, Dela Cerna 8, Sagmon 6, Ipang 5, Canete 5, Molero 4, Taboada 2, Resilla 2, Cabanero 2, Lopez 2

Second Game:

Aerosol-USPF (67)— Rivera 15, Labares 11, Durano 9, Dajalos 7, D. Ferraren 6, Bardillas 6, Avila 4, Sereno 2, Tinoy 2, Budalo 2, J. Ferraren 2, Filoteo 1

Enervon-UC (63)—Rogado 16, Fajardo 12, Pao 7, Juliane 7, Luceno 4, Miranda 4, Ampoon 3, Quilantang 2, Gomez 2, Mohammad 2, Enriquez 2, Ypil 2. - Gabby G. Malagar (BANAT NEWS)