MANILA, Philippines - Bukod sa kanilang pang limang sunod na panalo, hangad rin ng mga Spirits na masikwat ang unang semifinals ticket.
Haharapin ng Cossack Blue ang Pharex B Complex ngayong alas-4 ng hapon matapos ang salpukan ng AddMix at Ani-FCA sa alas-2 sa elimination round ng 2010 PBL PG Flex-Erase Placenta Cup sa Ynares Sports Arena sa Pasig City.
Kasalukuyang hawak ng Spirits ang liderato sa likod ng kanilang 4-0 baraha kasunod ang Pharex Fighting Maroons (3-1), Excelroof 25ers (3-1), Cobra Ironmen (3-1), Fern-C Ferntastics (1-3), Transformers (1-3), Ascof Lagundi Cough Busters (1-3) at Cultivators (0-4).
Pinitas ng Cossack ni coach Rene Baena ang kanilang pang apat na sunod na panalo nang takasan ang Ani-FCA, 70-69, tampok ang 18 puntos ni James Martinez, noong Huwebes.
Bukods kay Martinez, muli ring aasahan ng Asia Brewery franchise sina Paul Zamar, Earn Saguindel, Jay-R Taganas at Raffy Reyes katapat sina Vic Manuel, Woody Co, Marlon Adolfo at Arvie Braganza ng Fighting Maroons.
Umiskor ang Pharex ni Aboy Castro ng isang 103-89 paggiba sa sister team na Ascof Lagundi noong nakaraang Sabado.
Sa naturang tagumpay ng Fighting Maroons, tumipa si Manuel ng game-high 27 puntos.
Sa Final Four, ang dalawang mangungunang koponan matapos ang eliminasyon ang siyang kukuha ng ‘twice-to-beat’ advantage kontra No. 3 at No.4 teams.