Mambaling nanghawod na sab sa dance contest

CEBU, Philippines - Milarot na sab og daog ang Brgy. Mambaling sa 9th leg sa Go Ching Hai-Martina ug M. Lhuillier Kwarta Padala Cup Dancesport and Hip-Hop Circuit II diha sa Tisa Sports Complex.

Gipukan sa Mambaling ang kaparehas nilang ka agresibo nga Brgy. Guadalupe uban ang tulo ka golds, tulo ka silvers ug usa ka bronze sa open category.

Ang bulawan nga nakuha sa Mambaling naggikan nilang Jon Maurice Bahena ug Niza Zanoria sa standard youth open, Robert Paulia Cañiban ug Ellah Marie Marquez sa latin Juvenile ug Shardie Baydal ug Vaudeville Butanas sa latin youth.

Ang Guadalupe mitapos sa ikaduha sa ilang duha ka golds ug usa ka bronze. Ang ilang golds nakuha kortesiya nilang Jose Butch Tinio ug Hanna Jane Ricafranca ug junior dancesporters Joseph Miguel Cantilla ug Kate Mariel Macasero.

Mipahiluna sa ikatulo ang Brgy. Apas nga may tagduha ka silver ug bronze medals, gisundan sa Brgy. Mabolo sa ilang usa ka bronze.

Sa closed competition, ang Pacadas mipahiluna sa kinatumyang dapit uban ni Vinz Park ug Trisha nga nanghawod sa latin juvenile ug Dominique ug Lorraine Mae sa junior category.

Sa latin youth, gilangkat nila ni Jupe Flores ug Kristel Kaye ang titulo human gipilde ang tandem nilang Lon Brian Recerote ug Marie Signar.

Sa laing bahin, ang Reality Icon mipukan sa Pinoy Crew aron pagdaog sa unang dapit sa Hip-Hop contest. – BANAT NEWS