CEBU, Philippines - Tulo ka kulbahinam nga aksiyon ang masaksihan sa finals sa 2010 LLBA-ABA Fiesta Cup basketball tournament karong gabii diha sa Barangay Agus gym sa dakbayan sa Lapu-Lapu.
Sugdan ang duwa sa alas-6:30 sa gabii uban sa team Jon Elis ug Radaza I nga mag-ilog sa titulo sa Inter-color division.
Ang junior team sa Jon Elis mosuway sab og langkat sa titulo sa dihang harungon ang Ilaya squad sa alas-7:30 sa gabii.
Sa commercial division, ang Ave Maria Sanctuary Park makigtakos batok sa San Remigio Beach Club sa main game nga gikatakda sa alas-8:30 sa gabii.
Ang Ave Maria magsalig sa abilidad ni ex-USJR Jaguar Luther Justiniani, samtang ang San Remigio maghangad sab sa kanhi-UV Lancers Adrian Lao ug Randy Delapisa.
Gipasiugdahan sa Lapu-Lapu Basketball Association (LLBA) ug Agus Basketball Association (ABA), ang Fiesta Cup 2010 gipaluyohan sab ni Agus Brgy. Capt. Joven Lauron, Councilor Jimboy Igot, Digo Tampus, Aqua Jamilla ug Jems Sportswear. – BANAT NEWS