3 Cebuano judokas moapil sa Hong Kong judo tourney

CEBU, Philippines - Tulo ka Cebuano judokas ang mosalmot sa duha ka adlaw nga Hong Kong International Judo Tournament 2010 karong Marso 5-7 didto sa Shek Kip Mei Sports Center sa Kowloon.

Ang Sugbuanong lawyer Vicente E. Fernandez II, kinsa mao karon ang presidente sa Central Visayas Judo Association ug Vice President sa Central Visayas of the Phlippine Judo Federation, maoy gitudlong team manager sa Philippine Team sa maong internasyonal nga kompetisyon. 

Labing menos 15 ka nasud lakip na ang Pilipinas ang mosalmot sa maong kompetisyon nga gipasiugdahan sa Hong Kong Judo Association.

Si Fernandez, kinsa usa ka third dan judoka ubanan sa laing duha ka Sugbuanong judokas nga si Vicente 'Nonoy' Fernandez III ug Alford Marimon.

Ang 19 anyos nga si Fernandez III, nidaog og gold medal atol sa 2009 National Juniors Judo Championships didto sa SM-Marikina sa Manila.

Sa wala pa ang maong   daog, si Fernandez III daan nang mihakot og mga medalya sa nagkalain-laing judo competitions. Duha ka gold medals (Batang Pinoy in 2002 ug 2nd Philippine Olympic Festival-Regional Elimination didto sa Iloilo niadtong 2007); duha ka silver medals (Philippine National Juniors Judo Championships sa Manila niadtong 2007 ug 2nd Philippine Olympic Festival National Championship sa Manila niadtong 2007); ug duha ka bronze medals (2008 Universities Athletic Association of the Philippines ug National Juniors Judo Championships sa Manila niadtong 2008).

Lain pang mga sakop sa delegasyon naglakip ni Jose Rillo, team manager gikan sa University of the East, Luleo Panganiban (referee), coaches Julie Irene Divina, Michaele Dian So, Justin Keith Ver ug Michael Santos.

Ang mga atleta naglakip sab nila ni Jerome Jose Maria R. Angeo, Stephen Lorenzo Gerena, Rodimple Rodriguez, John Nicolai Humprey, Julio Fernandez, William Chia, Gian Taylor Dee, Jhonel Ryan Faelnar, Salvador Reyes, Kyra Mañalac, Monica Pineda, Maria Angelie Gerena, Andrea Camille Divina ug Precious Diane Rosos. – BANAT NEWS