Kim Yap naghari sa Labogon open chess

CEBU, Philippines - Si IM Kim Steven Yap maoy nangulo sa tanang mga mananaog sa bag-o lang natapos nga Labogon Open Chess Tournament nga gipasiugdahan sa Labogon Chess Learning Center (LCLC).

Si Yap mitali og 6.5 points aron pagdaog sa open division title ning usa ka adlaw nga kompetisyon nga gipaluyohan ni Labogon Brgy. Capt. Damaso Tumulak.

Gawas nga nibulsa og P4,000, si Yap nakabaton sab og libreng galastohan sa tanan niyang biyahe ngadto sa Malaysian Open karong Abril 5-13 sa Kuala Lumpur kortesiya sa naila na kaayong chess benefactor Boojie Lim sa Rose Pharmacy.

Si Venancio Loyola mibulsa sa P2,000 sa iyang pagpahiluna sa ikaduha uban ang 6.0 puntos. Sila si Voltaire Sevillano ug Neilman Lagutin parehong mipupo og 5.5 puntos, apan si Sevillano maoy nakaangkon sa ikatulo pinaagi sa superior tie-break output.

Si Sevillano nakadawat og P1,000, samtang si Lagutin nakaangkon og P700.

Mikompleto sa top seven finishers sa ilang 5.0 puntos matag usa mao sila si Yves Christian Fiel, Joel Fernan ug Adonis Buenaventura.

Sa kiddies category, sila si Felix Shaun Balbona, Alan Pason, Raymond Abellana ug John Francis Balbona, mirehistro og 5.5 matag usa. Apan si Felix Shaun Balbona maoy milangkat sa titulo pinaagi sa higher tie-breaker, samtang sila si Pason ug Abellana maoy mi-okupar sa sunod nga duha ka dapit ug si John Francis Balbona mikapyot sa ikaupat.

Sila si Axel Ta-al, Jan Cleomar Tilus, Mark Balbona, Christian Klent Dondoyo ug Efren Tonolite maoy mikompleto sa top nine finishers.

Sa laing bahin, ang top three sa women's category mao sila si Jessa Balbona (7.0 points), Sofia Balite (6.5 pts.) ug KC Morala (5.0 pts.).

Ang mga duwa gidumala ni tournament director Leonardo Alidani ug international arbiter Marvin Ruelan.    (BANATNEWS)